निशान परियारसिन्धुपाल्चोक, वैशाख २ — नयाँ वर्ष २०८३ को पहिलो दिन सिन्धुपाल्चोकको अरनिको राजमार्गअन्तर्गत बलेफी गाउँपालिका–८, नयाँपुलमा दुई मोटरसाइकल एकआपसमा ठोक्किँदा एक जनाको मृत्यु भएको छ भने तीन जना घाइते भएका छन्।
प्रहरीका अनुसार वैशाख १ गते अपराह्न करिब १६:१४ बजे बाह्रबिसेतर्फबाट लामोसाँघुतर्फ जाँदै गरेको बा.प्र. ०२–०४९ प ७७६२ नम्बरको मोटरसाइकल र विपरीत दिशाबाट आउँदै गरेको बा.प्र. ०३–०२–००१ प ९०७६ नम्बरको मोटरसाइकल आपसमा ठोक्किँदा दुर्घटना भएको हो।दुर्घटनापछि तत्कालै प्रहरी चौकी लामोसाँघुबाट प्रहरी नायब निरीक्षक बुक बहादुर राउतको कमाण्डमा चार जनाको टोली तथा इलाका प्रहरी कार्यालय बाह्रबिसेबाट प्रहरी निरीक्षक कृष्ण खड्काको कमाण्डमा पाँच जनाको टोली घटनास्थलमा खटिएको थियो। घाइतेहरूलाई उद्धार गरी सिन्धु सदाबहार अस्पताल, लामोसाँघु र बाह्रबिसे नगर अस्पतालमा उपचारका लागि पठाइएको प्रहरीले जनाएको छ।
दुर्घटनामा सुनकोशी गाउँपालिका–६ निवासी २५ वर्षीय जीवन खत्री गम्भीर घाइते भएका थिए। उनको उपचारका क्रममा सिन्धु सदाबहार अस्पताल, लामोसाँघुमा साँझ १७:२० बजे मृत्यु भएको हो।त्यसैगरी, त्रिपुरासुन्दरी गाउँपालिका–३ निवासी १४ वर्षीय जितबहादुर श्रेष्ठको टाउकोमा गम्भीर चोट लागेको छ। उनलाई थप उपचारका लागि धुलिखेल अस्पताल रिफर गरिएको छ।यस्तै, बा.प्र. ०३–०२–००१ प ९०७६ नम्बरको मोटरसाइकल चालक बाह्रबिसे नगरपालिका–६ निवासी २९ वर्षीय कुमार तामाङ र पछाडि सवार उनकी श्रीमती ३१ वर्षीया सुनिता तामाङ सामान्य घाइते भएका छन्। उनीहरूको बाह्रबिसे नगर अस्पतालमा उपचार भइरहेको छ।दुर्घटनामा संलग्न दुवै मोटरसाइकलमा क्षति पुगेको छ भने सडक अवरुद्ध नभई सवारी आवागमन नियमित रूपमा सञ्चालनमा रहेको प्रहरीले जनाएको छ। घटनाबारे थप अनुसन्धान भइरहेको छ।
