निशान परियार
सिन्धुपाल्चोक चौतारा।
सिन्धुपाल्चोकको केही स्थानहरूमा बढ्दो सवारी दुर्घटनालाई न्यूनीकरण गर्ने उद्देश्यले इलाका प्रहरी कार्यालय बाह्रविसे र प्रहरी चौकी लामोसाँघुको संयुक्त पहलमा सडक सचेतना कार्यक्रम सम्पन्न भएको छ।
उक्त कार्यक्रम इलाका प्रहरी कार्यालय बाह्रविसेका प्रहरी निरीक्षक कृष्ण खड्का र प्रहरी चौकी लामोसाँघुका प्रहरी नायब निरीक्षक बुकबहादुर राउतको नेतृत्वमा सञ्चालन गरिएको हो। कार्यक्रममा ट्राफिक नियमको पालना, तीव्र गति नियन्त्रण, मादक पदार्थ सेवन गरी सवारी नचलाउने, हेल्मेट तथा सिटबेल्टको अनिवार्य प्रयोग, ओभरटेक गर्दा सावधानी अपनाउने जस्ता विषयमा विस्तृत जानकारी दिइएको थियो। साथै सवारी साधनको नियमित जाँच र सडक अनुशासन कायम गर्नुपर्नेमा पनि जोड दिइएको थियो।
प्रहरीले पछिल्लो समय बढ्दो लापरबाहीका कारण दुर्घटनाको जोखिम उच्च बन्दै गएको उल्लेख गर्दै यस्ता कार्यक्रमले जनचेतना अभिवृद्धि गर्ने विश्वास व्यक्त गरेको छ। सहभागीहरूले पनि आफूहरू अब ट्राफिक नियमप्रति अझ जिम्मेवार बन्ने प्रतिबद्धता जनाएका छन्।कार्यक्रममा दुर्घटना भइसकेपछि अपनाउनुपर्ने आवश्यक सावधानी र प्राथमिक उपचारसम्बन्धी जानकारी पनि दिइएको थियो। दुर्घटना हुँदा सर्वप्रथम घाइतेलाई सुरक्षित स्थानमा सार्ने, भीड नियन्त्रण गर्ने तथा तुरुन्त प्रहरी र एम्बुलेन्सलाई खबर गर्ने सुझाव दिइयो। गम्भीर घाइतेलाई अनावश्यक रूपमा हल्लाउने वा स्थान परिवर्तन गर्दा थप क्षति हुन सक्ने भएकाले सावधानी अपनाउन आग्रह गरिएको थियो।त्यसैगरी, रगत बगिरहेको अवस्थामा सफा कपडाले थिचेर रोक्ने, सासप्रश्वास जाँच गर्ने, बेहोस अवस्थामा सिधा ढाडमा राख्ने जस्ता प्राथमिक उपचारका उपायबारे पनि जानकारी गराइएको थियो। साथै दुर्घटनास्थलमा उपस्थित व्यक्तिहरूले भिडियो खिच्ने वा भीड बढाउनेभन्दा सहयोग गर्ने संस्कार विकास गर्नुपर्नेमा जोड दिइएको थियो।प्रहरीले यस्ता सचेतनामूलक कार्यक्रमलाई आगामी दिनमा पनि निरन्तरता दिने जनाएको छ। यसले दुर्घटना न्यूनीकरण मात्र नभई आपतकालीन अवस्थामा सही व्यवहार अपनाउने बानीको विकासमा समेत मद्दत पुग्ने विश्वास लिइएको छ।
