निशान परियार
सिन्धुपाल्चोक खाडीचौर।
सामुदायिक वन उपभोक्ता महासंघ, नेपाल को ३१औँ स्थापना दिवसको विशेष अवसर पारेर सिन्धुपाल्चोक जिल्लाका विभिन्न स्थानीय तहहरूमा “वनको दिगो व्यवस्थापन र सामुदायिक अधिकार: समावेशी, सुशासन र हरित अर्थतन्त्र समृद्धिको आधार” भन्ने मूल नाराका साथ विशेष अन्तरक्रिया कार्यक्रम शृङ्खलाबद्ध रूपमा सम्पन्न भएको छ।
यसै क्रममा, सुनकोशी गाउँपालिकामा आयोजित अन्तरक्रिया कार्यक्रम सामुदायिक वन उपभोक्ता महासंघ, नेपाल जिल्ला महासंघ सिन्धुपाल्चोकका अध्यक्ष जनकराज गिरीको अध्यक्षतामा भव्यताका साथ सम्पन्न भयो। उक्त कार्यक्रममा सुनकोशी गाउँपालिकाका अध्यक्ष टपिन्द्रप्रसाद तिमल्सिना प्रमुख अतिथिको रूपमा उपस्थित हुनुहुन्थ्यो।
विभिन्न पालिकाहरूमा शृङ्खलाबद्ध कार्यक्रमसामुदायिक वनका विद्यमान सवाल र आगामी गन्तव्यका विषयमा सरोकारवालाहरूबीच गहन छलफल गराउने उद्देश्यले जिल्लाका विभिन्न पालिकाहरूमा यो अभियान सञ्चालन गरिएको थियो। जसअन्तर्गत:२०८३ जेष्ठ २ गते: इन्द्रावती गाउँपालिका२०८३ जेष्ठ ३ गते: हेलम्बु गाउँपालिका२०८३ जेष्ठ १६ गते: लिसङ्खुपाखर गाउँपालिका२०८३ जेष्ठ १७ र १८ गते: सुनकोशी गाउँपालिका यी सबै स्थानीय तहहरूमा आयोजना गरिएका अन्तरक्रिया कार्यक्रमहरूको मुख्य सहजीकरण सामुदायिक वन उपभोक्ता महासंघ, नेपाल बागमती प्रदेश महासंघका अध्यक्ष विनोद सापकोटाले गर्नुभएको थियो। सहजकर्ता सापकोटाले सामुदायिक वनको दिगो व्यवस्थापन, नीतिगत चुनौतीहरू, उपभोक्ताको अधिकार रक्षा तथा वनलाई हरित अर्थतन्त्र र समृद्धिसँग कसरी जोड्न सकिन्छ भन्ने विषयमा महत्त्वपूर्ण कार्यपत्र र मार्गचित्र प्रस्तुत गर्नुभएको थियो।
अन्तरक्रियाका मुख्य विषयवस्तुहरूकार्यक्रममा बोल्दै प्रमुख अतिथि एवं सुनकोशी गाउँपालिकाका अध्यक्ष टपिन्द्रप्रसाद तिमल्सिनाले सामुदायिक वनले नेपालको पर्यावरण संरक्षण र स्थानीय नेतृत्व विकासमा पुर्याएको योगदानको प्रशंसा गर्नुभयो। उहाँले स्थानीय सरकार र सामुदायिक वन उपभोक्ता समूहहरू परिपूरक भएर अगाडि बढ्नुपर्ने र वन पैदावारको सही सदुपयोग गर्दै आयआर्जनका कार्यक्रमहरूमा जोड दिनुपर्ने धारणा राख्नुभयो।यसैगरी, कार्यक्रमका अध्यक्ष जनकराज गिरीले स्थापना दिवसको गरिमामाथि प्रकाश पार्दै उपभोक्ताहरूको हकअधिकार सुनिश्चित गर्न तथा वन ऐन, नियमको व्यावहारिक कार्यान्वयनका लागि स्थानीय र प्रदेश सरकारसँग महासंघले निरन्तर समन्वय गरिरहने प्रतिबद्धता व्यक्त गर्नुभयो।सामुदायिक वन उपभोक्ता महासंघ, नेपाल बागमती प्रदेश महासंघ र जिल्ला महासंघ सिन्धुपाल्चोकको संयुक्त आयोजनामा सम्पन्न भएको उक्त कार्यक्रमको सञ्चालन यज्ञ दङ्गालले गर्नुभएको थियो। कार्यक्रममा विभिन्न सामुदायिक वन उपभोक्ता समूहका पदाधिकारीहरू, स्थानीय जनप्रतिनिधिहरू, वन प्राविधिक तथा वातावरण संरक्षणकर्मीहरूको बाक्लो उपस्थिति रहेको थियो।
