निशान परियार
सिन्धुपाल्चोक खाडीचौर।
जिल्ला प्रशासन कार्यालय, सिन्धुपाल्चोकको आयोजनामा ‘जिल्ला विपद् जोखिम न्यूनीकरण तथा व्यवस्थापन समिति’ को महत्त्वपूर्ण बैठक आज सम्पन्न भएको छ। वर्षायाम नजिकिँदै गर्दा जिल्लामा हुन सक्ने सम्भावित प्राकृतिक विपद्, त्यसको पूर्वतयारी र न्यूनीकरणका उपायहरूबारे छलफल गर्न उक्त बैठक आह्वान गरिएको हो।
बैठक जिल्लाका प्रमुख जिल्ला अधिकारी शशिधर घिमिरेको अध्यक्षतामा सम्पन्न भएको थियो। बैठकमा जिल्लाको समग्र विपद् व्यवस्थापन, उद्धार तथा राहत सामग्रीको उपलब्धता र स्थानीय तहहरूबीचको समन्वयको विषयमा गहन छलफल भयो।
इको पहिरो नियन्त्रणमा सुनकोशीका अध्यक्ष तिमल्सिनाको जोड
बैठकमा विशेष गरी सिन्धुपाल्चोक जिल्ला भौगोलिक रूपमा पहिरोको उच्च जोखिममा रहेको चर्चा गरिएको थियो। सो क्रममा सुनकोशी गाउँपालिकाका अध्यक्ष टपिन्द्रप्रसाद तिमल्सिनाले आफ्नो धारणा राख्दै वातावरणमैत्री पहिरो नियन्त्रण प्रविधिलाई प्राथमिकता दिनुपर्नेमा जोडदार माग गर्नुभयो।अध्यक्ष तिमल्सिनाले परम्परागत प्रविधिभन्दा प्रकृतिमैत्री र दिगो रूपमा पहिरो रोक्न सकिने उपायहरू अवलम्बन गर्नुपर्ने बताउँदै स्थानीय सरकारहरू यसका लागि सहकार्य गर्न तयार रहेको स्पष्ट पार्नुभयो।
बैठकमा जिल्लाका विभिन्न क्षेत्रका प्रतिनिधिहरूको बाक्लो उपस्थिति रहेको थियो। बैठकमा:सहायक प्रमुख जिल्ला अधिकारी,जिल्लाका विभिन्न नगरपालिका तथा गाउँपालिकाका प्रमुख एवं अध्यक्षहरू,विभिन्न सरकारी कार्यालयका कर्मचारी तथा सुरक्षा निकायका प्रमुखहरू,विपद् व्यवस्थापन र सामाजिक क्षेत्रमा क्रियाशील विभिन्न संघ-संस्थाका प्रतिनिधिहरू,जिल्लाका क्रियाशील सञ्चारकर्मीहरूको सहभागिता रहेको थियो।
बैठकको अन्त्यमा अध्यक्ष एवं प्रमुख जिल्ला अधिकारी शशिधर घिमिरेले विपद्को समयमा तत्काल परिचालन हुन सक्ने गरी सुरक्षा निकाय, रेडक्रस र स्थानीय तहहरूलाई सजग रहन निर्देशन दिनुभयो। वर्षातको समयमा आउने बाढी र पहिरोका कारण राजमार्ग र ग्रामीण सडकहरू अवरुद्ध हुन सक्ने भएकाले बाटो खुलाउने ठूला यन्त्रहरूलाई रणनीतिक स्थानहरूमा तयारी अवस्थामा राख्ने निर्णय समेत बैठकले गरेको छ।सञ्चारकर्मीहरूले विपद्को समयमा सही र तथ्यपरक सूचना प्रवाह गरेर नागरिकलाई सचेत गराउन महत्त्वपूर्ण भूमिका खेल्नुपर्नेमा समेत बैठकमा जोड दिइएको थियो।
