निशान परियार
सिन्धुपाल्चोक, बलेफी —
डेङ्गी र अन्य किटजन्य रोगहरूको रोकथाम तथा लामखुट्टेको लार्भा नष्ट गर्नका लागि बलेफी गाउँपालिकामा सरोकारवालासँगको अभिमुखीकरण कार्यक्रम भएको छ। कार्यक्रम असार १९ गते जनप्रतिनिधि, स्थानीय संघसंस्था, सुरक्षा निकाय र सञ्चारकर्मीहरूसँग र असार २० गते स्वास्थ्यकर्मी तथा कर्मचारीहरूसँग छुट्टाछुट्टै गरी आयोजना गरिएको हाे।कार्यक्रमको उद्घाटन गर्दै जिल्ला समन्वय समिति सिन्धुपाल्चोकका उपप्रमुख पदमनाथ नेपालले महामारी नियन्त्रणका लागि सबै पक्ष मिलेर काम गर्नुपर्ने र जनस्तरसम्म सचेतना फैलाउनु आवश्यक रहेको उल्लेख गर्नुभयो। बलेफी गाउँपालिका वडा नं. २ का वडा अध्यक्ष छवीलाल न्यौपानेले जनप्रतिनिधिको सक्रियता र नेतृत्व विना महामारी रोकथाम सम्भव नभएको बताउँदै स्थानीय तहमा समन्वय अझै सशक्त बनाउनुपर्ने धारणा राख्नुभयो। गाउँपालिकाका प्रमुख प्रशासकीय अधिकृत लोकेन्द्र बहादुर राईले प्रभावकारी रुपमा सचेतनाको काममा लाग्ने प्रतिबद्धता जनाउँदै समुदायको साथबिना सफल रोकथाम असम्भव रहेको बताउनुभयाे। कार्यक्रममा सहजीकरण बलेफी गाउँपालिका स्वास्थ्य शाखा प्रमुख चेतन घिमिरेले गर्नुभएको थियो भने स्वास्थ्य प्रशिक्षक परशुराम श्रेष्ठले डेंगी रोगको लक्षण, फैलिने तरिका, रोकथामका उपाय र समुदायले अपनाउनु पर्ने व्यवहारबारे बिस्तृत प्रस्तुति दिनुभएको हाे। उक्त अभिमुखीकरण कार्यक्रमले स्थानीय तहमा डेंगी तथा किटजन्य रोगको जोखिम न्यूनिकरण गर्न आवश्यक रणनीति, जनसहभागिता र सचेतनाको महत्वलाई प्राथमिकतामा राखेर योजना बनाउन सहयोग पुर्याउने विश्वास लिइएको छ।
