निशान परियारचौतारा
पञ्चायती निरङ्कुशताविरुद्धको ऐतिहासिक जनआन्दोलनका क्रममा पिस्करमा भएको नरसंहारको स्मरणमा माघ १ गते ४२ औँ पिस्कर स्मृति दिवस विशेष कार्यक्रमका साथ मनाइएको छ। स्मृति दिवसको अवसरमा लेखक तथा राजनीतिक अभियन्ता सरेश नेपालद्वारा लिखित पुस्तक ‘जेलभित्रका सङ्घर्ष’ को लोकार्पण गरिएको हो।
कार्यक्रममा नेकपा एमालेका अध्यक्ष केपी शर्मा ओलीले पिस्कर आन्दोलन नेपाली लोकतान्त्रिक आन्दोलनको इतिहासमा एक महत्त्वपूर्ण मोड भएको उल्लेख गर्नुभएको छ। निरङ्कुशताविरुद्ध संघर्ष गर्ने शहीद तथा योद्धाहरूको योगदान इतिहासमा सधैँ अमर रहने बताउनुभएको छ।
वक्ताका रूपमा अमृत बोहराले पिस्कर आन्दोलनले जनतामा चेतना र प्रतिरोधको भावना जागृत गराएको बताउनुभएको छ। लोकतन्त्र आजको अवस्थासम्म आइपुग्नुमा यस्ता आन्दोलनहरूको ठूलो भूमिका रहेको धारणा व्यक्त गर्नुभएको छ।पुस्तकका लेखक सरेश नेपालले ‘जेलभित्रका सङ्घर्ष’ आफ्ना भोगाइ र अनुभूतिमा आधारित कृति भएको तथा पञ्चायती शासनकालको संघर्षलाई अभिलेखित गर्ने ऐतिहासिक दस्तावेज भएको बताउनुभएको छ।
पुस्तकमाथि समीक्षात्मक टिप्पणी प्रस्तुत गर्दै डा. देवी नेपालले यस कृतिले पञ्चायती शासनकालको राज्य दमन, जेल जीवनका पीडा र राजनीतिक बन्दीहरूको संघर्षलाई जीवन्त रूपमा प्रस्तुत गरेको उल्लेख गर्नुभएको छ।
