निशान परियार
चौतारा सिन्धुपाल्चोक ।
सिन्धुपाल्चोक जिल्लाको सुनकोशी गाउँपालिका मा पछिल्लो समय शिक्षा, स्वास्थ्य र पूर्वाधार विकासका कार्यक्रमहरू तीव्र गतिमा अघि बढिरहेका छन्। गाउँपालिकाले सडक, मठमन्दिर, गुम्बा लगायत विभिन्न पूर्वाधार निर्माणका साथै शिक्षा र स्वास्थ्य क्षेत्रलाई समेत उच्च प्राथमिकतामा राखेर विभिन्न कार्यक्रम सञ्चालन गरिरहेको जनाएको छ।
गाउँपालिका अध्यक्ष टपिन्द्र प्रसाद तिमल्सिना का अनुसार सुनकोशीलाई सुन्दर र समृद्ध गाउँपालिका बनाउने लक्ष्यसहित विकासका कामहरू निरन्तर अघि बढिरहेका छन्। उहाँले स्थानीय बासिन्दाको जीवनस्तर सुधार गर्न शिक्षा, स्वास्थ्य र पूर्वाधारलाई सँगसँगै अघि बढाइएको बताउनुभयो।शिक्षा क्षेत्रलाई विशेष प्राथमिकता दिँदै गाउँपालिकाले कक्षा १ देखि १२ सम्मका सबै विद्यार्थीलाई निःशुल्क अध्ययन गर्ने व्यवस्था मिलाएको छ। यस कार्यक्रमबाट गाउँपालिकाभित्रका विद्यार्थीहरूलाई आर्थिक भार बिना अध्ययन गर्न सहज भएको जनाइएको छ।त्यसैगरी गाउँपालिकामा रहेका दुईवटा क्याम्पस — सुनकोशी क्याम्पस र ठोकर्पा सामुदायिक क्याम्पस — मा नियमित रूपमा अध्ययन गर्ने विद्यार्थीहरूका लागि पनि गाउँपालिकाले निःशुल्क अध्ययनको व्यवस्था गरेको जनाएको छ। यसले उच्च शिक्षामा पहुँच विस्तार गर्न महत्वपूर्ण भूमिका खेलेको गाउँपालिकाको विश्वास छ।गाउँपालिकाले शिक्षा क्षेत्रको सुधारका लागि विद्यालय पूर्वाधार विकास, शैक्षिक सामग्री सहयोग, शिक्षक व्यवस्थापन तथा अन्य शैक्षिक कार्यक्रमहरू पनि सञ्चालन गर्दै आएको छ। साथै स्वास्थ्य सेवाको पहुँच बढाउन स्वास्थ्य चौकी तथा स्वास्थ्य सेवाको स्तरोन्नति गर्ने काम पनि अघि बढाइएको जनाइएको छ।गाउँपालिकाले विकासका यी गतिविधिहरूलाई निरन्तरता दिँदै आगामी दिनमा थप योजनाहरू ल्याएर सुनकोशीलाई अझ सुन्दर, व्यवस्थित र समृद्ध गाउँपालिकाको रूपमा विकास गर्ने लक्ष्य राखेको अध्यक्ष तिमल्सिनाले बताउनुभयो।
। धन्यवाद 🙏
