निशान परियार
सिन्धुपाल्चोक खाडीचौर।
गोरखनाथ कल्याण केन्द्र नेपालद्वारा निर्माण सम्पन्न बसन्तेश्वर शान्ति गोरक्षधाम मन्दिरको समुद्घाटन समारोह भव्य तथा धार्मिक माहोलबीच सम्पन्न भएको छ। कार्यक्रममा विभिन्न तहका जनप्रतिनिधि, स्थानीय अगुवा, समाजसेवी तथा श्रद्धालु भक्तजनहरूको उल्लेखनीय उपस्थिति रहेको थियो।
समारोहमा सुनकोशी गाउँपालिका अध्यक्ष टपिन्द्रप्रसाद तिमल्सिना, बलेफी गाउँपालिका अध्यक्ष गंगाबहादुर तामाङ, त्रिपुरा सुन्दरी गाउँपालिका अध्यक्ष भक्तध्वज बोहरा, मन्दिर निर्माण समितिका अध्यक्ष रामशरण तिमल्सिना, वडा नं. ७ का वडा अध्यक्ष ईश्वर तिमल्सिना लगायतका विशिष्ट व्यक्तित्वहरूको सहभागिता रहेको थियो। कार्यक्रममा स्थानीय बासिन्दा तथा विभिन्न क्षेत्रबाट आएका भक्तजनहरूको उत्साहजनक उपस्थितिले समारोहलाई अझै भव्य बनाएको थियो।
कार्यक्रमलाई सम्बोधन गर्दै सुनकोशी गाउँपालिका अध्यक्ष टपिन्द्रप्रसाद तिमल्सिनाले धार्मिक तथा सांस्कृतिक सम्पदाको संरक्षण र प्रवर्द्धनमा यस्ता मन्दिरहरूको महत्वपूर्ण भूमिका रहने बताउनुभयो। उहाँले मन्दिरले केवल आस्थाको केन्द्र मात्र नभई स्थानीय स्तरमा पर्यटन प्रवर्द्धन, रोजगारी सिर्जना र आर्थिक गतिविधि वृद्धि गर्न समेत योगदान पुर्याउने विश्वास व्यक्त गर्नुभयो। साथै, यस्ता संरचनाहरूको संरक्षण र व्यवस्थापनमा सबै पक्षको सहकार्य आवश्यक रहेको उहाँको धारणा थियो।त्यसैगरी बलेफी गाउँपालिका अध्यक्ष गंगाबहादुर तामाङले मन्दिर जस्ता धार्मिक स्थलहरूले समाजमा एकता, सद्भाव र सहिष्णुताको सन्देश फैलाउने उल्लेख गर्नुभयो। उहाँले सामुदायिक सहकार्यबाट निर्माण भएका यस्ता परियोजनाहरूले समाजलाई सकारात्मक दिशामा अघि बढाउन प्रेरणा दिने बताउँदै आगामी दिनमा यस्ता प्रयासहरूलाई निरन्तरता दिनुपर्नेमा जोड दिनुभयो।त्रिपुरा सुन्दरी गाउँपालिका अध्यक्ष भक्तध्वज बोहराले आफ्नो मन्तव्यमा यस्ता प्रख्यात तथा ऐतिहासिक महत्व बोकेका मन्दिरहरू त्रिपुरा सुन्दरी गाउँपालिकामा पनि रहेको उल्लेख गर्दै धार्मिक सम्पदाको संरक्षण, प्रवर्द्धन र समुचित व्यवस्थापनमा सबै तहको सक्रियता आवश्यक रहेको बताउनुभयो। उहाँले धार्मिक स्थलहरूको विकासले स्थानीय पहिचान स्थापित गर्नुका साथै आन्तरिक तथा बाह्य पर्यटक आकर्षित गर्न महत्वपूर्ण भूमिका खेल्ने धारणा राख्नुभयो।
मन्दिर निर्माण समितिका अध्यक्ष रामशरण तिमल्सिनाले मन्दिर निर्माणको सम्पूर्ण प्रक्रिया, चुनौती र सफलताको यात्राबारे प्रकाश पार्दै यस कार्यमा सहयोग पुर्याउने सम्पूर्ण दाताहरू, सहयोगी हातहरू तथा स्थानीयवासीप्रति हार्दिक आभार व्यक्त गर्नुभयो। उहाँले मन्दिरलाई आगामी दिनमा धार्मिक, सांस्कृतिक तथा आध्यात्मिक गतिविधिको केन्द्रको रूपमा विकास गर्ने प्रतिबद्धता व्यक्त गर्दै यसको संरक्षण र प्रवर्द्धनमा सबैको साथ आवश्यक रहेको उल्लेख गर्नुभयो।समारोहका क्रममा धार्मिक विधि–विधानसहित पूजाआजा तथा विशेष कार्यक्रमहरू सम्पन्न गरिएका थिए। भक्तजनहरूको ठूलो उपस्थितिले उक्त क्षेत्रको धार्मिक आस्था र सामाजिक एकताको सशक्त उदाहरण प्रस्तुत गरेको देखिन्थ्यो।यस मन्दिरको निर्माणसँगै उक्त क्षेत्र धार्मिक पर्यटनको नयाँ गन्तव्यको रूपमा विकास हुने अपेक्षा गरिएको छ। स्थानीयवासीहरूले यसलाई आफ्नो गौरवको रूपमा लिँदै यसको संरक्षण र प्रचार–प्रसारमा सक्रिय भूमिका खेल्ने विश्वास व्यक्त गरेका छन्।
