निशान परियार
चौतारा, चैत १० गते । कुविण्डेमा शीत भण्डार सञ्चालनमा आएको छ । कृषि उत्पादनको प्रमुख केन्द्रको रूपमा परिचित यस क्षेत्रमा लामो समयको पर्खाइपछि शीत भण्डार निर्माण भई सञ्चालनमा आएपछि स्थानीय कृषकहरू उत्साहित बनेका छन् ।संघ, प्रदेश र स्थानीय तहको संयुक्त लगानीमा करिब १० करोड रुपैयाँको लागतमा निर्माण गरिएको उक्त शीत भण्डार ३३० टन क्षमताको रहेको छ । हाल यसमा करिब १६५ टन आलु भण्डारण गरिसकिएको छ । आलु उत्पादनको मुख्य सिजन सुरु भएसँगै शीत भण्डार सञ्चालनमा आउँदा कृषकहरूलाई ठूलो राहत मिलेको छ ।यसअघि उत्पादन भएको आलु भण्डारणको अभावमा कुहिएर खेर जाने समस्या भोग्दै आएका कृषकहरू अब भने आफ्ना उत्पादन सुरक्षित रूपमा राख्न सक्ने भएका छन् । शीत भण्डार सञ्चालनपछि कृषकहरूले व्यवसायीक उत्पादनतर्फ उन्मुख हुने योजना बनाएका छन् । चौतारा साँगाचोकगढी नगरपालिकाको प्रमुख कृष्णप्रसाद सापकोटाले शीत भण्डारले कृषकहरूको उत्पादन संरक्षण, बजार व्यवस्थापन तथा आम्दानी वृद्धि गर्न महत्वपूर्ण भूमिका खेल्ने बताउनुभयो । उहाँका अनुसार यसले कृषिमा आत्मनिर्भरता बढाउँदै स्थानीय अर्थतन्त्रलाई समेत टेवा पु¥याउनेछ ।स्थानीय कृषक प्रेमप्रसाद सापकोटाले शीत भण्डार सञ्चालनसँगै कृषकहरूलाई सहकारीमार्फत सहज रूपमा सेवा उपलब्ध गराइएको जानकारी दिनुभयो । उहाँले उत्पादनको उचित व्यवस्थापन र लागत घटाउन शीत भण्डारले सहयोग पु¥याउने विश्वास व्यक्त गर्नुभयो । स्थानीय कृषकहरूका अनुसार पहिले आलु भण्डारणको सुविधा नहुँदा ठूलो मात्रामा उत्पादन खेर जाने गरेको थियो भने बीउ भण्डारणका लागि समेत काठमाडौंसम्म जानुपर्ने बाध्यता थियो । अहिले भने स्थानीय स्तरमै सुविधा उपलब्ध भएपछि समय र लागत दुवै बचत हुने भएको छ । स्थानीय स्तरमै यस्तो पूर्वाधार निर्माण भएसँगै कृषकहरूले आफ्नो उत्पादनको उचित मूल्य पाउने अपेक्षा गरिएको छ । शीत भण्डारले चौतारा साँगाचोकगढी नगरपालिका, बलेफी, जुगल र सुनकोशी गाउँपालिकाका कृषकहरूको जीवनस्तर उकास्न महत्वपूर्ण योगदान पुर्याउने अपेक्षा गरिएको छ।
