निशान परियार
सिन्धुपाल्चोक खाडीचौर।
सिन्धुपाल्चोकको अधेरीस्थित ट्राफिक कार्यालयले यात्रुहरूको सुरक्षित यात्रालाई सुनिश्चित गर्ने उद्देश्यले ठाउँ–ठाउँमा छड्के अनुगमनलाई तीव्रता दिएको छ। बढ्दो सवारी चापसँगै सडक दुर्घटनाको जोखिम पनि बढ्दै गएको अवस्थालाई मध्यनजर गर्दै ट्राफिक प्रहरीले विभिन्न स्थानहरूमा सक्रिय रूपमा निगरानी बढाएको हो।
छड्के अनुगमनका क्रममा सवारी चालकहरूले अनिवार्य कागजपत्र साथमा नराखेको, सिट बेल्ट प्रयोग नगरेको, चप्पल लगाएर सवारी चलाएको तथा मोबाइल फोन प्रयोग गर्दै सवारी चलाएको पाइएपछि त्यस्ता चालकहरूलाई नियन्त्रणमा लिई नियमअनुसार कारबाही गरिएको ट्राफिक कार्यालयले जनाएको छ। साना लापरबाहीहरूले पनि ठूला दुर्घटना निम्त्याउन सक्ने भएकाले नियम कार्यान्वयनमा कडाइ गरिएको हो।
यात्रुहरूको सुरक्षाका लागि नै यस्तो छड्के अनुगमन सञ्चालन गरिएको ट्राफिक कार्यालय सिन्धुपाल्चोकका इन्चार्ज विष्णु थापाले बताउनुभयो। उहाँका अनुसार चालकहरूमा ट्राफिक नियम पालना गर्ने बानी विकास गराउनु र सम्भावित दुर्घटनालाई न्यूनिकरण गर्नु अभियानको मुख्य उद्देश्य हो। “सुरक्षित यात्रा सुनिश्चित गर्न सबै चालकले ट्राफिक नियमको पूर्ण पालना गर्नु अनिवार्य छ,” उहाँले भन्नुभयो।
उहाँले सवारी चलाउँदा आवश्यक कागजपत्र अनिवार्य रूपमा साथमा राख्न, सिट बेल्ट प्रयोग गर्न, मोबाइल फोन प्रयोग नगर्न तथा सुरक्षालाई प्राथमिकतामा राखेर जिम्मेवार ढंगले सवारी चलाउन सबै चालकहरूलाई आग्रह गर्नुभयो। साथै, यस्ता छड्के अनुगमनलाई आगामी दिनहरूमा अझ प्रभावकारी बनाउँदै निरन्तरता दिइने जानकारी दिनुभयो।
ट्राफिक कार्यालय सिन्धुपाल्चोकको यस सक्रिय पहलले चालकहरूमा सचेतना अभिवृद्धि गर्नुका साथै सडक दुर्घटना न्यूनीकरणमा महत्वपूर्ण योगदान पुग्ने अपेक्षा गरिएको छ। यात्रु सुरक्षालाई केन्द्रमा राखेर गरिएका यस्ता प्रयासहरूले समग्र ट्राफिक व्यवस्थापनलाई अझ सुदृढ बनाउने विश्वास गरिएको छ।
