निशान परियार
सिन्धुपाल्चोक जिल्लाका एघार स्थानीय तह पूर्ण खोप सुनिश्चित घोषित भएका छन् । बिहीबार सदरमुकाम चौतारा साँगाचोकगढी नगरपालिकालाई पूर्ण खोप सुनिश्चित नगरपालिका घोषणा गरिएपछि जिल्लाले ९० प्रतिशतभन्दा बढी लक्ष्य प्राप्त गरेको जनाइएको छ । बुधबार मात्रै सुनकोशी गाउँपालिका पूर्ण खोप सुनिश्चित पालिका घोषित भएको थियो । कार्यक्रममा पूर्ण खोप सुनिश्चितता, यसको दिगोपन तथा स्थानीय तहको भूमिकाका बारेमा विस्तृत छलफल र प्रतिबद्धता व्यक्त गरिएको गाउँपालिका अध्यक्ष टपिन्द्र प्रसाद तिमल्सिनाले जानकारि दिनुभयो । सरोकारवाला निकाय, स्वास्थ्यकर्मी, जनप्रतिनिधि तथा समुदायका सदस्यहरूको सक्रिय सहभागितामा गाउँपालिकालाई पूर्ण खोप सुनिश्चित पालिका घोषणा गरिएको स्वास्थ्य शाखा प्रमुख गोविन्द हायुले जानकारि दिनुभयो ।
चौतारा साँगाचोकगढी नगरपालिकाको पूर्ण खोप सुनिश्चितता घोषणाको अवसरमा प्रतिनिधिसभा क्षेत्र नं. १ का सांसद माधव सापकोटा, जिल्ला समन्वय समितिका प्रमुख बालकृष्ण श्रेष्ठ, प्रमुख जिल्ला अधिकारी किरण थापा र जिल्ला जनस्वास्थ्य कार्यालय प्रमुख दुर्गा बजगाईंले नगर प्रमुख कृष्णप्रसाद सापकोटालाई प्रमाणपत्र हस्तान्तरण गर्नुभयो । नगर स्वास्थ्य शाखा प्रमुख दिनेश नेपालका अनुसार २३ महिनासम्मका ४५८ बालबालिकाले सबै प्रकारका खोप पूरा गरिसकेकाले चौतारा साँगाचोकगढीलाई पूर्ण खोप नगरपालिका घोषणा गरिएको हो । कार्यक्रममा सांसद सापकोटाले नेपालको १६ औं योजना अनुसार खोप र स्वास्थ्यलाई अनिवार्य तथा नैसर्गिक अधिकारका रूपमा लिइएकाले लक्ष्य हासिल गर्न नगरपालिका सक्रिय भएको भन्दै धन्यवाद दिनुभयो । जिल्लामा पाँचपोखरी थाङ्पाल गाउँपालिका बाहेक सबै स्थानीय तहहरू पूर्ण खोप सुनिश्चित घोषणा भइसकेका छन् ।
