विदुर आचार्य
सशस्त्र प्रहरी बल, नेपालले सीमा सुरक्षा र आन्तरिक शान्ति–सुरक्षा सुदृढ बनाउने उद्देश्यसहित दुई महत्वपूर्ण कार्यक्रम गरेको छ । ‘सीमावासीसँग सशस्त्र प्रहरी’ अभियान अन्तर्गत कात्तिक १८ गते भोटेकोशी गाउँपालिका वडा नंमवर–२ मा सीमा सुरक्षासम्बन्धी अन्तरक्रिया कार्यक्रम सम्पन्न गरिएको हो । कात्तिक १९ गते सशस्त्र प्रहरी बल र नेपाल प्रहरीले संयुक्त रूपमा भिड नियन्त्रण तथा निशेधआज्ञा कार्यान्वयनसम्बन्धी अभ्यास प्रदर्शन गरेका हुन् । भोटेकोशीमा आयोजित अन्तरक्रिया कार्यक्रममा सशस्त्र प्रहरी नायव महानिरीक्षक अञ्जनी कुमार पोखरेलले सीमा सुरक्षाको महत्व र सामुदायिक सहभागिताको आवश्यकता औंल्याउँदै सीमावर्ती जनसमुदायसँग सहकार्य र विश्वासका सम्बन्ध बलियो बनाउने सशस्त्र प्रहरी बलको नीति स्पष्ट पार्नुभयो । स्थानीय जनप्रतिनिधि, भन्सार, अध्यागमन, नेपाल प्रहरी, सञ्चारकर्मी र समुदायका प्रतिनिधिहरूको उत्साहजनक सहभागितामा सीमा सुरक्षा र आपतकालीन तयारी सुदृढीकरण कार्यक्रम भएको हो ।
कार्यक्रममा अवैध चोरी–निकासी नियन्त्रण, सीमा अपराध र अतिक्रमण रोकथाम, सीमा चिन्हहरूको संरक्षण तथा स्थानीय तहसँगको प्रभावकारी समन्वयबारे विस्तृत छलफल गरिएको छ । सशस्त्र प्रहरी बलका अनुसार सीमाक्षेत्रका चुनौती समाधान गर्न समुदायसँग निरन्तर संवाद र सहकार्य नै प्रभावकारी उपाय हो । कात्तिक १९ गते सशस्त्र प्रहरी बल, नेपाल नं.१६ गण मुख्यालय सिन्धुपाल्चोकमा नेपाल प्रहरीसँगको संयुक्त अभ्यास सम्पन्न गरिएको थियो । प्रमुख जिल्ला अधिकारी बन्धुप्रसाद बास्तोला सहितको सहभागितामा सम्पन्न अभ्यासमा बागमती प्रदेश प्रहरी कार्यालयका प्रमुख प्रहरी नायव महानिरीक्षक अरुण पौडेल र सशस्त्र प्रहरी बल, नेपाल नं.३ गढीमाई बाहिनीका बाहिनीपति नायव महानिरीक्षक अञ्जनी कुमार पोखरेल लगायतको उपस्थिति रहेको थियो ।
कृतिम रूपमा सिर्जना गरिएको घटनामा भिड नियन्त्रण, कफ्र्यू आदेश कार्यान्वयन, रणनीतिक प्रतिक्रिया र प्रयोगात्मक संयन्त्रको प्रदर्शन गरिएको थियो । सशस्त्र प्रहरी बलका अनुसार यस्ता संयुक्त अभ्यासहरूले आकस्मिक अवस्था वा असामान्य सुरक्षा परिस्थितिमा नेपाल प्रहरी र सशस्त्र प्रहरी बलबीचको आपसी समन्वय, दक्षता र प्रतिक्रिया क्षमतालाई अझ सुदृढ बनाउने विश्वास गरिएको छ । जिल्लामा सम्पन्न यी कार्यक्रमहरू सशस्त्र प्रहरी बल, नेपालले सीमा सुरक्षा, आन्तरिक सुरक्षा, राजश्व संकलन र विपद् व्यवस्थापन अन्तर्गत सुरक्षा संयन्त्रलाई बलियो बनाउने दिशामा महत्वपूर्ण कदमका रूपमा लिइएको छ ।
